साइप्रसबाट नेपालीको अनुरोध- सरकार जहाज पठाइदेऊ, घर फर्कन्छौं

महिना बितेपछि घर भाडा कसरी तिर्ने ? पैसा सक्किसक्यो के खाने ? कलेज, युनिभर्सिटीको फी तिर्न बाँकी नै छ । साइप्रसमा अध्ययनका लागि आएका नेपाली विद्यार्थीहरु अहिले यस्तै मानसिक तनावमा छन् ।

राजेन्द्र कुमार मोक्तान आठ महिनाअघि मात्रै झण्डै १० लाख रुपैयाँ खर्च गरेर साइप्रसमा अध्ययन गर्न आएका थिए । कोरोनाको महामारीसँगै गरिएको लकडाउनले उनलाई साइप्रसमा टिक्न सकिँदैन कि जस्तो लागेको छ । त्यसैले साइप्रसमा तनाव लिँदै बस्नुभन्दा तत्काल नेपाल फर्कन चाहान्छन् उनी ।

‘न काम छ, न पढाइ । खानाबस्न नै समस्या भएपछि घर फर्कनुको विकल्प छैन । एक महिना अझै लकडाउन लम्बिने हो भने यहाँको अबस्थाबारे कल्पना पनि गर्न सकिँदैन । त्योभन्दा बरु तत्काल घर फर्कन पाए राम्रो हुन्थ्यो,’ मोक्तानले अनलाइनखबरसँग भने ।

मोक्तानमात्र हैन अध्ययनका लागि साइप्रस आएका झण्डै ५ देखि ७ हजार विद्यार्थीहरुलाई अहिले खानबस्न नै समस्या देखिएको छ । त्यसैले ठूलो संख्यामा नेपाली विद्यार्थीहरुले घर फर्कने इच्छा व्यक्त गरेको एनआरएनए साइप्रसले जनाएको छ ।

लकडाउनका कारण बेरोजगार बनेपछि उनीहरुलाई समस्या परेको हो । दैनिकजसो विद्यार्थीहरुले आफूलाई सम्पर्क गरेर नेपाल फर्कने इच्छा ब्यक्त गरेको त्यहाँस्थित पत्रकार दिनेश गौतमले बताए ।

एनआरएनए साइप्रसका प्रवक्तासमेत रहेका गौतमले भने, ‘मलाई २५-३० जना विद्यार्थीहरुले नै म्यासेज गरेर दूतावासमार्फत घर फर्काउन जहाजको व्यवस्था गरिदिन अनुरोध गरेका छन् ।’

‘रुसले, भारतले पनि साइप्रसबाट आफ्ना नागरिकहरुलाई स्वदेश फर्काइसकेको छ । नेपालीहरुले देश फर्कन चाहान्छु भन्दै दूतावासमा सम्पर्क गरेका छन् । तर सरकार किन गम्भीर देखिँदैन ?’ गौतमले प्रश्न गरे ।

Leave a Reply

Your email address will not be published. Required fields are marked *